LEGAZPI CITY – Nasa 50 mga nawawalat na barangay sa bilog na probinsya kan Albay an kinakaipuhang maideklarar na drug-cleared ngunyan na taon 2024 segun sa Philippine Drug Enforcement Agency (PDEA) Albay.
Segun kay Noe Briguel, namamayo kan nasambit na opisina, an mga rason kun nata may mga barangay an dae pa naidedeklalarar na drug-cleared hasta sa ngunyan, ini huli ta dae pa natatapos an saindang pinaggigibong intervention program asin dae pa nakakasumiter an iba nin documentary requirements asin iba pa.
Tinawan-doon ni Briguel, sa totoo, madali man sana an mga requirements alagad nadidipisilan an barangay na magsumiter kan mga ini.
Mientras, maabot man sa 90% an mga barangay na drug-cleared na sa probinsya.
Pangapodan kan ahensya, tutukan nin marhay asin pokusan an drug-clearing tanganing mawara na an ilegal na droga sa barangay.
