Gipailawum na sa state of calamity ang Barangay Pasian sa Monkayo, Davao de Oro human sa nahitabong Diarrhea outbreak nga gikamatay sa 5 samtang anaa sa 184 ang padayong giobserbahan.
Sa impormasyon gikan sa local government unit sa Monkayo, wala pay resulta ang ulahing water sample nga gikuha gikan sa tinubdan sa tubig mainom sa mga residente nga gipadala dinhi sa Davao City aron ipailawum sa test.
Apan sumala kang Monkayo Mayor Ramil Gentugaya, ang unang sample nga gipailawum sa laboratory result, migawas nga dunay bacteria ang tubig gawas nga nakitaan og cyanide o usa ka matang sa kemikal.
Sumala pa nga sukad Lunes nakasinati ang mga residente sa pagpanakit sa ilang tyan human nakainom sa tubig gikan sa tubod apan wala dayon gitug-an hinungdan nga midaghan pa ang mga residente nga nangasakit ug gikamatay sa lima ka tawo nga gilangkuban sa 38, 41, 88, 78-anyos ug usa ka tulo ka adlaw pa lang nga baby.
Base sa Environment Sanitation Report gikan sa Provincial Health Office, ang tinubdan sa tubig sa maong area wala na disinfect sukad kini gitaod niadtong tuig 2002, wala usab kini kural ug nahimutang duol sa rubber plantation.
Sa karon dunay gitagana nga tanke ang lokal nga panggamhanan alang sa tubig nga mainom sa katawhan ug gidid-an una nga gamiton ang tubig gikan sa tubod samtang gimanduan ang OIC Municipal health officer nga si Dr. Jhericx V. Gapate nga tutukan ang problema aron matubag ang mga hinanaling medical nga panginahanglanon sa mga pasyente nga temporaryong gipahimutang sa brgy. gymnasium. BNFM-DAVAO
