Arestado ang lima ka persona sa ginkasa nga drug buy-bust operation sang gintingub nga pwersa sang Capiz-PPDEU, Pontevedra MPS, Capiz PPO kag PDEA 6 sa Brgy. Intongcan, Pontevedra, Capiz.
Ginkilala ang mga nagkaladakpan nga sanday Ermelio Jimenez, 48-anyos, mekaniko kag isa sa mga Priority List of Anti-Illegal Drugs Watchlist sang mga awtoridad sa probinsya; Gemma Jimenez, 58-anyos; Cyril Delos Santos, 38-anyos; Adrian Bauson, 46-anyos lunsay residente sang Brgy. Tanque, Roxas City kag Mary Grace Dela Cruz, 29-anyos nga residente naman sang Brgy. Balintawak, Bantayan Island, Cebu.
Nakuha sa posesyon kag paghinakop sang mga nagkaladakpan ang 25 tanan ka plastic sachets sang ginapatihan shabu lakip na dire ang nabakal sang police poseur buyer kag ginabanta nagabug-at sang 120 gramos nga nagabalor tanan sang P816,000.
Narekober man ang 1 unit sang .38 calibre nga armas-luthang nga may tatlo ka bala, cellphone, sling bag, mga drug paraphernalia kag P20,000 nga buy bust money.
Nahibaluan nga anay napreso na sanday Ermelio kag Delos Santos tungod man sa iligal nga droga, apang nakaguwa matapos naka-avail ang mga ini sang plea bargaining agreement.
Lunsay ginakabig nga mga High Value Individual (HVI) ang nasambit nga mga persona.
Sa karon, nakahunong sa karsel sang Pontevedra PNP ang mga suspetsado para sa nagakaigo nga disposisyon kag natalana nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002. | Judy Ann Juare
