3 ka personalidad, sikop sa dul-an 1.5 million shabu sa CDO

DETENADO na sa Maharlika Custodial Facility, Cagayan de Oro City Police Office ang tulo ka personalidad human masikop sa drug buy bust operation sa mga sakop sa Regional Drug Enforcement Unit 10 diha sa Zone 2, Brgy. Puerto, ning siyudad sa Cagayan de Oro.

Naila sa mga otoridad ang mga dinakpan nga sila Dardin C. Monredondo; Jay C. Jumalon, kinsa Directorate of Intelligence (DI) watchlist ug Norbert E. Cabatuan pulos hingkud ang edad.

Subay sa report sa kapolisan, nasikop ang mga suspek dihang mikagat sa gipahigayong drug buy bust operation sa kapolisan gamit ang 1000 pesos nga buy bust money.

Samtang nakumpiska gikan sa mga dinakpang ang laing 12 ka pekete sa gitouhang shabu nga adunay gibug-aton nga dili mu-ubos sa 200 gramos nga adunay estimated street value nga PhP1,360,000.00.

Gawas niini, nakumpiska usab sa mga otoridad ang mga drug paraphernalia ug mga personal nga gamit.

Sa pagkakarun gihan-ay na sa kapolisan ang kasong paglapas sa Sections 5 ug 11, sa Article II ubos sa Republic Act 9165 kon comprehensive dangerous drugs act of 2002 batuk sa suspek.

Tungod sa maong kalampusan gidayeg usab ni PRO 10 Regional Director PBGEN BENJAMIN C ACORDA JR, ang operating unit sa malampusong operasyon nga miresulta sa pagkasikop sa maong mga suspek ug pakusgon pa niini ang kampanya batuk sa iligal nga druga ubos sa iyang pamunuan arun pabilin nga malinawn ang tibuok bahin sa Northern Mindanao.

BNFM Cagayan de Oro