Naaksidente ro tatlo ka menor de edad sa andang ginasakyan nga motorsiklo sa may Cardinal Sin corner Calachuchi Road Brgy. Andagao, Kalibo, Aklan bandang alas 12:30 it kaaganhun.
Sa report, samtang nagapatigayun ro mga katapo it Kalibo PNP it Motorized Anti-Criminality Riding Team, nasipeatan ku mga raya ro sangka motorsiklo kung siin ro daywa ka angkas kara hay owa it suksok nga helmet.
Ginparahan it mga pulis ro motorsiklo pero imbes nga magpundo hay nagpaspas pa ro driver it pagmanehu rasun nga linagas it pulis.
Pero pag abot ku mga raya sa may Calachuchi road sa may sementeryo hay bumalandra ro mga raya ag bumunggo sa sangka panchon.
Sa pag usisa it mga pulis, nasayuran nga ro driver hay sangka 17yo ag ro daywa kara ka angkas nga mga baye hay sangka 16yo ag 13yo.
Nag angkon it lastro ro driver nga confine makarun sa ospital samtang ro daywa ka angkas nana hay nag angkon it minor injury.
Gin-impound ro motorsiklo sa Kalibo MPS samtang ro daywa ka baye nga menor de edad hay ginturn-over sa WCPD. / ANN DESLENE SALAZAR
