Elsa Cabrera
KABANKALAN CITY, Negros Occidental —Sa pagtakop sang filing sang Certificate of Candidacy (COC) sadtong Oktubre 8, sa syudad sang Kabankalan, may mga nakahingagaw file sang ila COCs nga naga-representar ang nagkalain-lain nga sektor sa syudad, kag isa sa ila amo si Mark John Fabale, nga nasiplatan sang Brigada News FM-Kabankalan.
Si Fabale ang gina-represinta ang sektor sang youth kag mga Persons with Disability (PWD) sa iya pagpapili bilang Sangguniang Panglungsod (SP) candidate para sa 2025 local elections sa syudad.
Ginpahayag ni Fabale nga siya nagapadalagan bangod may ara siya sang tatlo ka “C”—credentials, capacity, kag character o credibility—nga kinahanglan para mangin isa ka epektibo nga konsehal.
“For the last 15 years, ara na ko sa public service, indi lang galing sa politika. Nakita ko nga ang Kabankalan nagakinanglan sang options para sa genuine nga youth representative. Ang aton nga city council may napulo ka konsehal kag kada isa naga-representar sang tagsa ka agenda ukon sektor,” pahayag ni Fabale.
Suno sa iya, wala sang genuine ukon matuod-tuod nga youth representative ang syudad, kag ini ang gusto niya bag-ohon.
“Subong, nakita ko nga wala pa gid sang genuine nga youth representative nga nagadesisyon nga magdalagan para mangin tingog sang youth sector,” suno kay Fabale.
Dugang pa niya, handum niya nga makahatag sang maayo nga programa para sa mga kabataan kag makahimo sang mabakod nga pundasyon para sa youth sector.
Luyag man ni Fabale nga makahatag sang mga oportunidad sa mga Kabankalanon kag suporta sa mga young entrepreneurs nga iya ginalantaw nga isa ka ‘impactful kag sustainable’ nga plano para sa mga lamharon.
“Sa tanan nga taga-Kabankalan, nagapadalagan ako bangod kinahanglan ninyo sang husto nga representasyon. Kon paminsaron ninyo nga may ara ako sang tatlo ka ‘C’—credentials, capacity, kag character o credibility—nga kinanglanon para mangin isa sa inyo nga konsehal, ginabilin ko ang desisyon sa inyo,” pahayag niya.
Si Fabale ang isa ka anay manunudlo sa Barangay Tan-awan, nangin Youth Services Provider sang Kabankalan sa idalum sang City Social Wefare and Development Office, kag sa karun isa ka entrepreneur. -BNFM Kabankalan
