LEGAZPI CITY – Arestado an sarong 26-anyos na soltero asin residente kan Purok-3, Brgy Tamaoyan, Legazpi City, sa isinagibong Drug Buy-Bust Operation kan Legazpi City Police Station (CPS) sa siyudad kan Legazpi.
An nasambit na suspek, naisagibo sa pakikipagtabangan kan nasambit na hepatura sa Philippine Drug Enforcement Agency (PDEA) Albay Provincial Office kun sain nadakop an nasambit soltero sa kahalabaan kan Duterte Road near Mayon Black Lava Zipline Adventure, Brgy 54-Mabinit, siyudad kan Legazpi.
Naarestar an suspek matapos na makipagtransaksyon sa sarong poseur buyer na pulis asin pinabakalan nin sarong (1) heat sealed transparent plastic sachet na may laog na pinagtutubudang shabu kapalit an P12,500. An mga narekober na drug item, may pigkakarkulong timbang na 15 gramos asin nagkakantidad nin P102,000.
Nahahampang ngonian an nasambit na suspek sa mga kasong pagbalgar sa RA 9165 o mas midbid bilang Comprehensive Dangerous Drug Act of 2002. Presente nang nagtitinir an suspek sa Legazpi CPS para sa magkakanigong disposisyon.
Mientrastanto, sarong tindahan nin ukay-ukay sa brgy. Orosite sa parehong siyudad an nilaog nin parahabon kun sain nakua kan suspek an cash asin nagkapirang gamit sa nasambit na tindahan.
Sa kua kan CCTV footage, pinirit buksan kan nasambit na suspek an cash drawer kan tindahan kun sain nakua kan suspek an P1,200 na cash, back pack, asin sampulong (10) pades nin sapatos. Segun man sa tagsadiri kan nasambit na ukay-ukayan, ipapa-ubaya na sana subuot ninda sa kapulisan an pagdakop sa nasmabit na suspek.
