-Reymund Titong
KABANKALAN CITY, Negros Occidental — Nagakahangawa nga madulaan sang puluy-an ang kapin 250 ka mga pamilya nga naga-estar sa karun sa lima ka mga purok (portion sang Molave, Red Mahogany, Ipil-ipil, Tar-apple kag Langka) sa Barangay Tabugon sa syudad sang Kabankalan, sa pagbawi sang Philippine National Bank (PNB) sa duta sang Dacongcogon Sugar Central.
Sa interview sang Brigada News FM-Kabankalan kay Barangay Kagawad Reyjan V. Mahusay, iya gin-kumpirmar ang pag-koordinar sang sheriff sa ila agud mangayo bulig sa pag-assess kung pila ka pamilya ukon households ang ma apektohan sa pagbawi sang bangko sang masobra 50 ektaryas nga duta sang central.
Dugang pa ni Mahusay, gina-alegar may writ of possession na nga gina-kaptan ang sheriff, ukon ang legal nga dokumento nga naga-mando sa mga illegal settlers nga maghalin na sa gina-panagiyahan nga duta sang bangko.
Ang Dacongcogon Sugar Central ang gina-kabig flagship program sang diktador nga presidente nga si Ferdinand Marcos, Sr. sang 1968 kag nagsugod sang pag-galing (mill) sang tubo (sugarcane) sang 1971 kaupod sang simbahan katoliko agud ma-solbar ang socio-economic nga problema sang probinsya.
Tuig 2008 naman sang opisyal nga nag-sarado nga sugar Central bangud sang pagkalugi kag utang sang PNB sang P51.43 million. May kalaparon ang central sang 564,429 square meters ukon 56.44 ektaryas.
Sa karun, naga kabudlayan ang mga opisyal sang Barangay bangud wala sila sang kapasidad nga maghatag sang relocation site para sa ma-apektuhan nga mga pumuluyo. Suno pa kay Mahusay, nga mangayo sila bulig sa alkalde sang Kabankalan agud mahatagan solusyon ang problema nga gina atubang sang ginatos nga pumuluyo sang Tabugon.*
