LEGAZPI CITY – Nag-abot na sa Probinsya kan Albay an nasa veinte mil (20,000) na mga bag nin lokal na bagas hale pa sa National Food Authority (NFA) San Jose, Occidental Mindoro.
An naunambitan nang mga bagas dara kan MV Wenvee Tres Vessel gikan sa Region 4 sa Tabaco Port na uminabot kan nakaagi sanang Sabado, Setyembre 9, 2023.
Pinangenotan ni Acting Branch Manager Criselda C. Dela Torre kan NFA Albay an pagmantenir na marhay an buong operasyon.
Nagpuon an operasyon sa sarong masusing pagrepaso sa gabos na dokumentos kan kargamento.
Kasunod kaini, komprehensibo man na ipig-inspeksyon an mga selyado asin bako selyadong mga kargamento.
Matapos na makumpleto an gabos asin maasigurar na maayos na an gabos, nagpuon na an pagdiscarga hale sa barko asin ipigkarga na sa mga trak na may mahihot na pagsunod sa mga protocol kan naunambitan nang ahensya.
