Owa nagduha-duha ro daywa ka Malay PNP personnel nga nagbulig sa pagsalbar sa nagaka eumos nga menor-de-edad sa isla it Boracay bandang alas 6:45 it gabii ku Hulyo 27.
Ginkilaea ro daywa ka pulis nga sanday PAT Charmelos Javil ag PAT Bryll Cyrus Llupar it Malay MPS.
Kat makita nanda nga ginasalbar it lifeguard nga si Yan Yan Delos Santos ro teenager nga Filipino-American tourist nga naeumos sa front beach sa Station 3, Brgy Manocmanoc, insigida man sanda nga nagbulig.
Base sa Malay PNP, inapok it mabaskug nga baeod sa madaeum nga bahin it baybay ro teenager.
Insigida man nga rumesponde ro Municipal DRRMO para magtao it first aid ag dinaea ro turista sa Ciriaco Tirol Hospital para sa nagakaigu nga pagbueong. // ANN DESLENE SALAZAR
