2 lalaki, arestado sa magkasuway na buy-bust ops sa primer distrito kan Albay

LEGAZPI CITY – Duwang lalaki an naarestar kan mga operatiba sa magkasuway na operasyon kontra iligal na droga sa primer distrito kan Albay.

Sa banwaan kan Sto. Domingo, partikularmente sa Purok 3, Brgy. Bagong San Roque, arestado an 38 anyos na construction worker na taga-Purok 6 kan nasambit na barangay.

Pinabakalan kaini an poseur buyer nin sarong sachet ki pinagtutubudang shabu sa kantidad na PHP500.

Sa operasyon, narekober pa sa suspek an 6 na sachet kan kaparehong item, PHP500 bill, nakarolyong aluminum foil, lighter, gunting, driver’s license niya asin national ID.

Mientrastanto, sa Sitio Paraputo, Brgy. Estancia kan Malinao, inarestar an 51 anyos na laborer na taga-Purok 4, Quinastillojan, syudad nin Tabaco.

Sa operasyon, nakua saiya an 2 sachet nin pinagtutubudang shabu kapalit ki PHP500 na buy-bust money.

An mga arestadong suspek kaibahan an mga nakumpiskar na mga ebidensya kapot na kan mga otoridad para sa magkakanigong disposisyon.

Leave a Reply

Your email address will not be published. Required fields are marked *