Nasapwan nga yara na sa advance state of decomposistion ang bangkay sang duha ka lalaki sa Sitio Cabanbanan, Brgy. Dolores, Dumalag, Capiz.
Ginkilala ang mga biktima nga sanday alyas Toto, 51-anyos kag alyas Molong, 48-anyos lunsay mga residente sang Brgy. Poblacion Ilawod, Dumarao.
Sandig sa impormasyon nagikan kay Police Major Cherry Visto, Hepe sang Dumalag Municipal Police Station, iya ginpahayag nga sang tinalikdan nga adlaw sang Biyernes, Oktubre 20 takna alas 4:50 sang hapon, nasapwan ang bangkay sang mga biktima nga nagakaagnas na.
Suno diri, gilayon nila ini nga ginpaidalom sa postmortem examination kag naguwa sa resulta nga may yara sang pilas sa dughan kag liog ang mga biktima tuga sang pagpanglabo kag pagpangbuno.
Positibo nila nga nakilala ang identity sang mga biktima pinaagi sa ID nga ila nakita kag ginkumpirma man sa mga himata sini.
Ginapahayag nga ulihi nakita sanday alyas Toto kag alyas Molong sa banwa sang Dumarao sadtong Oktubre 17 kag tatlo ka adlaw nga na missing. Sa karon, padayon sa gihapon ang imbestigasyon sang mga kapulisan kun sin-o ang yara sa likod sang krimen kag kun ano ang motibo sa pagpatay sa duha ka biktima. | Judy Ann Juare
