LEGAZPI CITY – Nakapagrehistro nin 17 volcanic earthquakes an Bulkang Mayon sa pagsabat kan bagong taon.
Ini an nagunong datos makalihis an 24 oras na monitoring kan Philippine Institute of Volcanology and Seismology.
Ini na pinakadakol na nairehistrong volcanic earthquakes sa nakalihis na semana.
Kasabay kaini, nairehistro pa an haros nwebe syentos na tonelada nin sulfur dioxide flux.
Nahilingan man an bulkan nin katamtamang pagsangaw na may kinyentos na metrong langkaw.
Sa ngunyan, nagtetenir sa alert level 1 an bulkan, asin padagos an abiso kan PHIVOLCS na likayan an pagrani sa 6 kilometers permanent danger zone nganing maibetaran an anuman na dai piglalaomang mga insidente.
