-Reymund Titong
KABANKALAN CITY, Negros Occidental — Nangin madinalag-on ang pag-bukas sang tuigan nga Inter-PO product farmers market sa Kalibutan Society Incorporated compound sa Barangay Oringao sa syudad sang Kabankalan sang Hunyo 10 asta 11.
Pahayag ni Elpidio Paglomutan, board of director (BOD) sang Masipag-National, ang pagpatigayon sang inter-PO ang isa ka dako nga kahigayunan sa mga peoples’ organization sa central padulong sa sur nga bahin sang Negros Occidental, nga mapasundayag ang ila mga nabilin nga produkto sa piyak sang pagpamahog sang El Nino phenomenon.
Dugang pa ni Paglomutan, tion man ini para sa mga asosasyon nga makahinun-anon kaupod nga kapariho nga mga mangunguma agud ma preparahan ang pagsulod naman sang La Niña, ukon ang tig-ululan.
Ang mga asosasyon nga nagpakigbahin amo ang Ammcao sang Barangay Camingawan, Ammacan sang Oringao, asosasyon sang Bakas, Kabuhian, Kasmmabi, Ammbo, gikan sa barangay Orong, Ammlu sang Barangay Hilamonan, Tusfa kag Casawa gikan sa Cuayan, AFA sang syudad sang Himamaylan, Pawis sang Binalbagan, kag asosasyon sang Patag kag Cafa sa banwa sang Hinigaran.
Ang nasambit nga aktibidad ang ginahiwat kada tuig nga nag-umpisa sang 2020. *