Gin-isyuhan sang notice of violation sang Social Security System (SSS) ang 12 ka mga establisyemento sa Roxas City sa ginpatigayon nga duha ka adlaw nga Run After Contributions Evaders (RACE) operation humalin Miyerkules kag Huwebes nga adlaw (Hunyo 19-20).
Suno kay Atty. Bernardo Dofitas Jr. Vice President sang SSS Visayas West 2 Division, 42 na tanan ka mga establisyemento sa syudad ang ila na-isyuhan sang notice of violation sumugod sang Enero tubtob subong nga bulan sang Hunyo sini nga tuig.
Gin-athag man ni Dofitas nga seryuso ang ila talatapan sa paglagas sang mga employers nga wala nagasunod sa ila nga obligasyon kag sarang pa ang mga ini nga pasakaan sang nagakaigo nga panumbungon kun magpabaya-baya sa pag-comply. | Judy Ann Juare
