Pinayagan na ng Inter-Agency Task Force (IATF) ang mga higher educational institutions na magsagawa ng face-to-face classes gamit ang 100% capacity ng mga silid-aralan sa mga COVID-19 Alert Level 1 areas.
Sinabi ni acting deputy presidential spokesperson Kris Ablan na makikita ito sa ilalim ng IATF Resolution 164 na inisyu nitong Biyernes.
Gayunman, nanindigan ang IATF na mananatiling limitado ang in-person classes sa mga fully vaccinated na teaching at non-teaching personnel, at sa mga estudyante.
Magpapatuloy naman ang flexible learning modalities para sa mga estudyante na hindi pa bakunado o partially vaccinated.
Ipinunto rin ng IATF na para sa operasyon ng HEI student dormitories ay wala nang ipatutupad na restriksyon sa kanilang operational capacity.
Gayunman, kailangan ng HEI na mag-secure ng clearance mula sa kanilang mga Local Government Units.
