Dead on arrival sa ospital ang isa ka 20-anyos nga lalaki samtang pilason naman ang duha ka mga kaupod sini matapos aksidente nga nabungguan sang wing van truck ang ila ginasakyan nga Rusi nga motorsiklo sa Barangay Poblacion Proper, Mambusao, Capiz takna alas 9:30 kagab-i sang Lunes, Agosto 21.
Ginkilala ang napatay kay Heartche Ucag Fano, residente sang Barangay Agambulong, Jamindan samtang ang mga napilasam amo sanday Roniel Magallanes Candelario, 19-anyos, residente sang Barangay Artuz, Tapaz, kag ang isa wala pa makilala.
Ang driver naman sang wing van truck ang ginkilala kay Rolex Cabrero Riambonaya, 43-anyos, residente sang Barangay Lawaan, Talisay City, Cebu.
Sa interview sang Brigada News FM Roxas City kay P/Cpt. Alladen Talaban, hepe sang Mambusao PNP, iya ginpahayag nga magatabok kuntani sa intersection sa atubang sang isa ka convenience store ang motorsiklo nga ginasakyan sang mga biktima halin sa Santa Catalina Street sang hinali ang mga ini nabungguan sang truck nga naghalin naman sa Kalibo, Aklan kag padulong sa Iloilo.
Bangud sa impact sang pagkabunggo, nag-angkon sang kapilasan sa magkatuhay nga parte sang lawas ang mga biktima nga gilayon man ginpadangat Mambusao District Hospital apang si Fano ang gindeklarar sang doktor nga dead on arrival.
Ginkustodiya naman sa Mambusao PNP ang driver sang truck para sa nagakaigo nga disposisyon. | Judy Ann Juare
