Patay ang isa ka backrider samtang pilason naman ang driver sang motorsiklo sa nagluntad nga aksidente sa Brgy. Lus-Onan, Panay, Capiz.
Ginkilala ang napatay kay Nilo Arroyo Biscan, 33-anyos samtang ang napilasan amo si Jaypee Barroa Amancio, 37-anyos kag lunsay mga residente sang Brgy. Daga sa nasambit nga banwa.
Sandig sa imbestigasyon sang Panay Municipal Police Station, samtang ginasubay nanday Amancio kag Biscan ang dalan sakay sa Honda 125 nga motorsiklo gikan sa Brgy. Calapawan padulong sa ila lugar, wala nadiparahan ni Amancio ang stock pile sang balas rason nga nasalakay nila ini kag gintunaan sang ila pagkatumba.
Ginapahayag nga wala sang street lights ang amo nga lugar.
Bangud sa natabo, nag-angkon sang pilas sa ulo kag nawala nga tuhod si Amancio samtang si Biscan ang nadulaan sang alinto.
Madasig naman nga ginpadangat sang MDRRMO-Panay ang mga biktima sa Roxas Memorial Provincial Hospital para sa pagbulong.
Apang, gindeklarar sang doktor nga dead on arrival si Biscan.
Nahibaluan nga yara sa impluwensya sang makahulubog nga ilimnon ang mga biktima sang natabo ang aksidente.
Sa karon, yara sa kustodiya sang Panay PNP ang motorsiklo nga naulamid sa aksidente para sa nagakaigo nga disposisyon. | Judy Ann Juare