Patay ang dalawang estudyante matapos aksidenteng bumangga ang sinasakyang motorsiklo sa isang steel barrier sa Barangay Lanting, Roxas, Isabela.
Sa inisyal na pagsisiyasat ng Roxas Police Station, nagtungo umano sa Roxas ang dalawang estudyante upang kumain ng lugaw dahil kagagaling ng dalawa sa isang inuman sa Lunsod ng Ilagan.
Kaugnay dito, mayroon umanong mga nakakita na mabilis ang pagmamaneho ng estudyante na parang nakikipagkarerahan hanggang sa bumangga sa isang steel barrier.
Napag-alaman na kapwa mga residente ng San Mateo, Quirino, Isabela ang dalawang biktima.
Idineklarang dead-on-arrival ang 15-anyos na drayber habang idinala pa sa pagamutan sa Tuguegarao City ang angkas nitong 17-anyos ngunit binawian rin ng buhay.