-Reymund Titong
KABANKALAN CITY, Negros Occidental – Inadlaw matapos maglupok ang bulkan Kanlaon, nagdaludo ang lahar padulong sa mga nanubuan nga mga barangay sang banwa sang La Castellana.
Ang pagdaludo sang tuman ka lapuyot nga lahar ang nag-awas sa mga karsada kag nakalab-ot man sa mga panimalay sa banwa, nga amo naman ang gintingwaan sang mga tropa sang 62nd Infantry Battalion nga mabuligan ang pag clearing sa mga dalanon, ilabi na sa Sitio Tamburong, Barangay Biak na Bato, La Castellana.
Sa nasambit nga banwa, pito ka mga barangay ang apektado nga gina-lakipan sang Barangay Robles, Cabagna-an, Mansalanao, Camandag, Sag-ang, Biak na Bato, kag Masulog.
Sa nakuha nga datus sang Brigada News FM-Kabankalan, as of June 8, yara sa 858 na tanan ka pamilya ukon 3,515 ka mga indibidwal ang nagapabilin sa evacuation center sang banwa.
Ang tropa sang 62nd Infantry Battalion ang nagabulig man sa padul-ong sang mga supplies sang pagkaon, tubig, kag iban pa sa mga apektado nga barangay.*
