SORSOGON CITY – Maaari na ngayong maka-avail ng 20% discount sa basic necessities at prime health commodities ang tatlong mga Senior Citizen na PDL’s ng Sorsogon City District Jail.
Ito’y matapos na mapagkalooban na ang mga ito ng kani-kanilang Senior Citizen’s ID at booklets.
Sa pahayag ni JO3 Rolly Buatis, sinabi nito na bagama’t sa kasalukuyan ay mayroon silang limampo’t isang (51) mga PDL’s na Senior Citizen, 3 pa lamang sa mga ito ang naka-avail sa kadahilanang inuna muna ang mga PDL’s na residente ng lungsod habang ang iba naman ay for approval pa ng City Administrator.
Ayon pa dito, lahat naman ng mga hindi maaaprubahan ay personal na lamang na sasadyain ng kanilang Help Desk Officer sa kani-kanilang mga bayan upang matiyak na lahat ng mga senior citizen sa City District Jail ay makaka-avail ng nasabing pribilehiyo.
Una rito, ang aktibidad ay inisyatiba ni District Jail Warden J/CInsp Rodolfo Versozsa Jr. at ng Sorsogon City District Jail personnel sa pakikipagtulungan ng Office of the Senior Citizen Affairs (OSCA), Sorsogon City sa pamumuno ni Mhely Pura.
