Reymund Titong
KABANKALAN CITY, Negros Occidental — Kulang nga pagtamod sa sektor sang agrikultura sa syudad sang Kabankalan, ang nagtulod sa tatlo ka mangunguma nga magpapili sa pagka-konsehal sa palaabuton nga 2025 local elections.
Ang tatlo ka mga mangunguma nga nag-file sang ila certificate of candidacy (COC) sang Oktubre 3, amo sanday Nestor Servando, Dennis Ramon Dalawis, kag si Emok Carbajosa.
Para kay Dalawis, dapat ang serbisyo ang naga diretso sa mga pumuluyo kag ang mga mangunguma naga-serbe nalang nga “kolateral sa mga issue nga gina-awayan sa syudad”.
Para sa ila, oras na para bag-ohon ang pamulitika sa syudad nga gina-updan sang matuod nga serbisyo sa mga kubos, ilabi na sa mga mangunguma nga ang naga-problema kag nagakabutang sa ital-ital kun indi mag-isa ang mga lehislatura kag ehikutibo.
Samtang, para naman kay Servando, ang handum nila bilang mangunguma ang bag-o nga “pamulitika nga nagarespeto sa isigkatawo, matuod nga serbisyo, pang gobyerno nga nakasandig sa matuod nga hustisya, pamulitika nga wala nagapakalain sa iban, pang gobyerno nga nagakabalaka sa pumuluyo nga kubos, kag pamulutika nga may gugma kag nagapati nga may diyos.”
Nagpahayag man ang tatlo nga may kapasidad ang syudad nga pabaskugon ang sektor sang agrikultura, apang kulang sang kongkreto kag sustenable nga mga plano.
Sa piyak nga bahin, suno naman kay Carbajosa, nga ang ila pag-representa sa mga mangunguma sa 2025 local elections, para mas mapamatian ang ila sektor kag mga kubos. -BNFM Kabankalan
