Mataas ro narekord nga kaso it COVID-19 infection ku nagtaliwan nga domiggo sa San Joaquin Iloilo, bangud sa mas mahugot ag istrikto nga paghimo it swab testing sa nasambitan nga lugar.
Base pa kay 1st District Board Member Marcelo Valentin Serag, designated incident commander it COVID-19 Task Forceng it banwa, tanan nga mga close contacts it mga nagpositibo sa virus, may ginambatyag man o uwa hay kinahangean nga magpa-idaeom sa swab testing.
Dikara man nasayuran nga haeos tanan nga nagpositibo hay mga pamilya ag kaibahan sa trabaho it nauna nga nagpositibo sa COVID-19 virus.
Sa contact tracing, na-identify nga naga-uli ro meain-eain nga mga indibidwal nga nagpositibo sa dose ka mga kabarangayan it banwa.
Ginapa-idaeom sa enhanced community quarantine (ECQ) ro mga barangay nga may marekord it masobra sa lima ka kaso it COVID-19 infection. Ginahiwat raya agud malikawan ro pagkaeat it virus sa lugar./JIL B. LACSON
