Nagpaabot og mensahe si Dioscoro Ramada, suod nga higala sa suspek nga midunggab patay sa iyang kaipon sa Purok 10, Brgy Tacunan ning syudad nga kung mamahimo mo-surrender nalang kini ug atubangon ang salaud.
Kahibaloan nga usa si Ramada ang kauban sa maglive-in partner nga nag-inum sa construction site nga ilang gitrabahoan sa Mintal, ayha nahitabo ang krimen.
Sa eksklusibong pakighinabi sa Brigada sa higala sa suspek, gisaysay niini nga nagka-inum matod sila sa mag live-in partner niadtong Dominggo sa hapon sa iyang bunkhouse kauban usab ang laing duha ka mga higala.
Bandang alas kwatro matod pa sa hapon nananghid ang suspek nga si Sergio Pornolles Xavier nga muoli og una kay mag-bahug sa iyang mga manok ug nagpabilin ang biktima nga si Emilia Fuentes Abo-Abo gumikan nag-videoki pa kauban ang mga higala.
Usa ka oras ang milabay, misunod na sab og uli ang biktima ug nakurat nalang matod pa ang mga kauban nini nga nag-inum dihang nabalitaan nila nga gipatay sa suspek ang iyang kaipon.
Dugang ni Dioscaro nga dili siya makatuo nga mabuhat sa higala sanglit wala matod pay bikil ang duha.
Gihulagway sab sa higala nga dili manakit ug maoy mahubog ang suspek apan hambog lang matod mangisturya kung makainom.
