KORTE na ang magdesisyon kalabut sa pagbakwi sa Tampakan, South Cotabato sa business permits sa ‘mining giant’ Sagittarius Mines (SMI). Kini ang reaksyon ni South Cotabato Governor Reynaldo Tamayo Jr., sa revocation sa permit sa alegasyong pagsupak sa municipal tax code.
Matud ni Tamayo Jr., gipasaka na sa SMI ang kaso kalabut sa maong lakang tungod sa pamahayag sa kompamya mali ang komputasyon sa munisipyo sa ilang tax. Nakasabot usab ang gobernador sa lakang sa mayor, tungod siya atong mayor sa munisipyo sa Tupi mihimo usab sa susamang lakang.
Setyembre 15, dihang gibakwi sa LGU- Tampakan ang permit sa SMI ug gilayong gipadlak ang buhatan niini sa lugar. Una nang, gibutyag ni Mayor Leonard Escobillo nga walay kamatuoran ang gibutagang SMI sa ilang diskripsyon sa kompanya sa ilang pag-aply alang sa business permit.
Sa aplikasyon sa SMI napatik nga “mineral exploration manufacturer” ang ilang negosyo apan nasuta nga nag-operate ang kompanya isip general engineering contractor.
Dugang sa mayor nasayod ang kompanya sa balaud apan gipili sa SMI ang dad-on ang hisgotanan sa korte. Giadtoan sa Brigada news FM ang opisina sa SMI sa Glamang, Polomolok apan pakyas makakuha og reaksyon kalabut sa isyu. I Richel Gubalani
