PAGPAHUGOT sa gipatuman nga quarantine protocols ug isolation ang panawagan sa labaw sa Department of Health (DOH) 12 sa mga LGUs.
Dungan sa pagkalakip sa Soccsksargen region sa 12 gikan sa 17 ka rehiyon sa Pilipinas nga naa sa ‘high risk level’ sa Covid-19 cases. Matud ni Dr. Arestides Concepcion Tan, Regional director sa DOH-12 angayang pakusgan sa mga LGUs’ ang isolation ug quarantine.
Partikular na ang mga naa sa temporary treatment and monitoring facility (TTMF). Aron masiguro nga walay indibidwal nga posibleng ‘infected’ sa virus nga wala naapil sa gi-isolate nga padayong nakatakod.
Kasamtangan naa na sa 400 hangtud 500 kaso sa virus ang natala sa rehiyon matag adlawa tandi 300 cases nakalabay’ng duha ka semana.
Giangkon usab ni Dr. Tan ang posibilidad nga duna nay local transmission sa Covid-19 Delta variant sa rehiyon. Apan giimbestigahan pa nila kini ug naghulat sa ipagula nga resulta sa genome sequencing sa gipadala nilang sample sa specimen.
Sa ulahing datus sa DOH-12, 17 ka Delta variant cases ang na-detect nila asa ang 16 ang nakarekober na samtang usa ang patay. Karon tulo kaso ‘suspected’ Delta variant cases sa rehiyon ang kasamtangan nilang giberipika.
Una nang, gibutyag ni DOH Secretary Francisco Duque III nga naa sa 92% sa siyudad ug probinsiya sa nasud ang naa sa high-risk level sa COVID-19. ( Richel Gubalani)
