Arnel Callet
KABANKALAN CITY, Negros Occidental — Isa si Ninfa Sanisit, 66 anyos, sa madamo nga mga persona nga dekada na nga nagapaninlo sang mga pantyon sa Kabankalan Public Cemetery.
Sa interview sang Brigada News FM-Kabankalan kay San Jose, naga umpisa ang ila trabaho sa pag pang-hilamon, kis-kis sang mga pinta sang pantyon, pakadto sa pag lettering sang mga pangalan sang mga nagtaliwan.
Suno pa sa iya, masobra 30 ka tuig nga pagpaninlo sang mga pantyon, subong nga tuig niya na batyagan ang tuman nga pigaw nga kita, bangud sa malain nga panahon.
“Sang nga nagligad nga tuig, nami to amon income, pero subong, pigaw. Ang amon nalang mga suki ang ginpanghawanan namon. Indi kami gani ka paminta maayo kay kun mag paminta kami, madula man gyapon bangud sang ulan,” pahayag ni Sanisit.
Sa isa ka ordinaryo nga kadakuon sang pantyon, nagabalor sang 600 ang ila panukot, dala na ang tanan, lakip na ang pinta sa pantyon kag lettering, suno pa sa iya.
“Sang una, nagalab-ot amon income sa P10,000 asta matapos ang tigkalalag, pero subong, pigaw gid,” pahayag ni San Jose.
Dugang pa niya, nag-umpisa sa hagad-hagad lamang ang iya pagpaninlo sa patyo asta nga nalingaw na sya sa nasambit nga bulohaton kada tyempo sang tigkalalag.
Sa iya nga madumduman, ginabulubanta yara nalang sa pulo ka mga tigulang ang nabilin nga padayon nga naga paninlo sa patyo sang syudad, bangud ang iban nagtaliwan na.
Si San Jose ang residente sang Barangay 6 sa nasambit nga syudad. — BNFM Kabankalan
