Daina E. Gerona
Naga-aso-aso nga gugma, ginapanglantaw nga motibo sa pagkapatay sang isa ka anay Overseas Filipino Worker (OFW) nga ginbuno sang iya ka live-in partner sa Purok Rizal, Barangay Talaban syudad sang Himamaylan, tinalikdan nga adlaw.
Base sa interbyu nga ginpatigayon sang Brigada Kabankalan sa kay PLTCOL Anthony G. Grande, Chief of Police sang Himamaylan City Component Police Station, nga bangud sa pagpangimon ni Jay – R Dela Rosa sa iya sini partner sa pagpangabuhi nga si Rose Ann Gajeto, wala niya mapunggan ang ka-init kag ini ang ginbuno sang makaduha ka beses sa idalum sang dughan, isa sa tiyan kag isa li-og nga ginapatihan amo ang pinaka-malala nga pilas nga na-angkon sang biktima.
Sa panalaysayon sang suspetsado, tinalikdan nga Hulyo 6, nagpa-uli ang iya ka live-in partner halin pungsod Saudi Arabia, apang wala ini nagdiresto pauli mismo sa ila nga puluy-an kag gina-alegar nga may ginpuli-an nga iban.
Dugang pa, napetsahan Hulyo 18, sang nagkit-anay ang duha sa Barangay Hall agud nga aregluhon ang pagkustodiya sang ila sini mga kabata-an kun sa diin, ginkasugtan nga ang kamagulangan nila nga bata ang magapabilin sa poder ni Jay-R kag ang duha naman amo ang sa kustodiya ni Rose Ann.
Pagpa-uli nila sa ila puluy-an kaupod ang ila kabata-an agud nga kuhaon sang iloy ang mga bayo kag iban pa nga kagamitan sang duha kabata-an nga iya pagadal-on, sang hinali lamang nga nagsinggitan ang biktima nga nagapangayo sang bulig kag didto nasaksihan mismo sang isa ka persona nga hunggod wala ginhingadlan ang pagbuno sang suspek sa biktima samtang yara man nga nagatambong ang ila mga kabata-an.
Ginhingagaw pa dala sa hospital ang biktima apang, gindeklara nga dead-on-arrival.
Angut sini, gilayon naman napasaka ang kaso nga murder batok sa suspetsado, kag sa karon, igapaidalum naman ang ila mga kabata-an sa counseling nga pagapatigayunon sang Department od Social Welfare and Development (DSWD) sang nasambitan nga syudad.
