Nanindigan sina Suspended Agriculture Undersecretary Leocadio Sebastian at resigned Sugar Regulatory Administration (SRA) chief Hermenegildo Serafica na wala silang ginawang mali sa paglalabas ng sugar order no. 4 para mag-angkat ng 300,000 metric tons ng asukal.
Sa magkahiwalay na pahayag kapwa sinabi ng dalawa na malinis ang kanilang konsensiya kasunod ng inilabas na rekomendasyon ng senate blue ribbon committee kung saan kasama sila sa mga pinakakasuhan ng administratibo at kriminal.
Sa inilabas na statement ni Serafica tinawag nitong ‘unfortunate’ dahil hindi umano binigyan ng bigat ng komite ang mga ebedensiyang iprinisenta nila sa hearing.
Aminado naman ang dating SRA chief na inaasahan na nila na ganito ang kalalabasan ng hearing pero nagtiwala pa rin sila sa proseso.
Samantala maikli naman ang sagot ni Usec. Sebastian at sinabing hinihintay pa niya ang kopya ng committee report ng senate blue ribbon.
Maliban kina Sebastian at Serafica kasama din sa pinakakasuhan ng senado sina former Sugar Board members Roland Beltran and Aurelio Gerardo Valderrama Jr.
