Naipaidaeum eon sa booking procedure si Mark Archie Torrefiel, 31yo ag sangka security guard ag ginaturo nga suspek sa pagpatay sa pawnshop manager nga si Bonna Hercia Ambay, 23yo.
Nasayuran nga kaina it udtro-adlaw hay naaresto raya sa Barangay Pinagbuhatan Pasig City pinaagi it manhunt o hot pursuit operation it Kalibo Municipal Police Station, Criminal Investigation and Detection GROUP (CIDG) NCRFU, National Intelligence Coordinating Agency (NICA) ag CIDG Aklan.
Base sa mugshot it suspek, nagapangatubang raya sa kasong Robbery with Homicide.
Nagaguwa man sa autopsy report it biktima nga nag angkon raya it 18 saksak sa eawas, ap-at kara ro fatal partikular sa dughan ag ginklaro nga owa it rape nga natabo.
Sa panig man it lolo it biktima nga si Atty. Benjamin Candare, kung panakaw eamang ro plano it suspek, kunta gingapos eang kara ro anang apo ag owa eon ginpatay.
Mabahoe man ro pagkanugon it ama it biktima nga si Mr. Bonifacio Ambay bangud maabu pa segun nga plano ro anang unga.
Suno man sa nag autopsy nga si Dr. Joe Martin Fuentes it PNP Crime Laboratory 6, makabig nga baganihan ro biktima bangud gindepensahan gid kara ro hana nga pagpanakaw base man sa mga defense wounds kara nga naangkon it anang kaeawasan.
Samtang, posible man nga maiuli hin-aga ro bangkay it biktima sa Nauring Pandan, Antique. / ANN DESLENE SALAZAR
