Nadagdagan pa ang puwersa ng Lakas-Christian Muslim Democrats sa Kamara matapos manumpa si House Senior Deputy Speaker Aurelio Gonzales Jr.
Sa harap nina Lakas-CMD President at House Speaker Martin Romualdez, Majority Leader Mannix Dalipe at Agusan Del Norte Representative Joboy Aquino ay pormal na umanib sa partido si Gonzales.
Kasama ni Gonzales bilang bagong miyembro sina Pampanga Representative Jon Lazatin at Siquijor Representative Zaldy Villa.
Sa ngayon, pitumpu’t pito na ang miyembro ng Lakas-CMD sa House of Representatives.
Ayon kay Romualdez, malaking tulong ang pagkakabilang ng tatlong kongresista sa lakas ng partido na isang koalisyon umano ng masisipag na lingkod-bayan na may integridad at dedikasyon.
Malawak na karanasan aniya ang ihahatid nina Gonzales sa Lakas-CMD na mapatutunayan ng naging pagsisilbi nila sa bawat distrito.
Sina Gonzales, Lazatin at Villa ay mga dating miyembro ng Partido Demokratiko Pilipino-Lakas ng Bayan o PDP-Laban.
