Importante nga nag-agi sa slaughter house ang mga ginakatay nga karne sang sapat ukon ang ‘Food Animals’ para masigurado nga hilway ang mga ini sa balatian kag safe nga konsumohon sang mga pumuluyo.
Ini ang ginpahayag ni Dr. Leonel Abordo, Provincial Veterenarian sang mainterview sang Brigada News FM.
Suno kay Abordo, tinutuyo sang slaughter house agud maproteksyunan ang ikaayong lawas sang mga konsumidor, kag para mapunggan ang paglapta sang mga balatian nagikan sa sapat pinaagi sa pagpaidalum sa ante-mortem inspection.
Ang ante-mortem inspection, dire ginalantaw ang sapat kun ini bala may balatian ukon hilo nga posible makahalit sa isa ka indibidwal.
Dugang pa sini, sa oras mahibaluan nga may ara makahalalit nga sakit ukon indi hilway konsumohon ang ginkatay nga karne sang sapat nagakadapat dire nga i-confiscate para indi na maglapta pa kag makahalit sa iban.
Matandaan, napunggan ang tuyo nga pagpasulod sang ‘Hot Meat’ nga karne kag kasudlan sang baboy sa Teodoro Arcenas Trade Center matapos natukiban sang mga market security nga wala ang mga ini sang nagakaigo nga permit o tatak halin sa slaughter house. | KMD Gicalde
