LEGAZPI CITY – Ilulunsar kan Department of Education (DEPED) Bicol sa bulan kan Enero sa masunod na taon an Projects 6B o “Bawat Batang Bicolano Bihasang Bumasa at Bumilang” komo pagpapakusog kan literacy asin numeracy skills kan mga estudyante sa nasambit na rehiyon.
Segun kay Regional Director Gilbert Sadsad, ini an primerong pagkakataon na ilulunsar an proyekto sa bilog kan nasyon nganing maresolberan an problema sa mga kaakian sa eskwelahan siring kan pagbasa, pagsabot kan pigbabasa asin itong dae pa tatao sa numero.
Dae suboot kakayanon kan eskwelahan na resolberan an siring na problema kan mga estudyante kaya kinakaipohan digdi an komunidad.
Nagtutubod an ahensya na magigin matrayumpo an proyekto na mabawasan an mga estudyanteng may problema sa literacy asin numeracy skills.
Segun pa kay Sadsad, saro ining multi-stakeholder approach na pigtatawan-doon an importansya kan volunteerism, community involvement asin Teachers Education Institutions (TEIs) sa mga inisyatiba sa edukasyon sa ground level.
