Personal nga nagtambong si President Ferdinand “Bongbong” Marcos Jr. sa pagpanagtag sang libre nga bugas sa 1,000 ka mga pigado nga mga pumuluyo sa Capiz lakip na diri ang mga naapektuhan sang red tide.
Ang nasambit nga ayuda ang nagikan sa Department of Social Welfare and Development’s (DSWD) Pantawid Pamilyang Pilipino Program (4Ps) under Level 1 (survival) and Level 2 (subsistence), ginhiwat ang distribusyon sa Capiz Gymnasium, Roxas City, Oktubre 6.
Ang mga sinako nga bugas ang lakip sa 42,180 smuggled sacks nga nagabalor tanan sang P42 million nga nakumpiskar sang Bureau of Customs – Port of Zamboanga (BOC-POZ) sa isa ka warehouse sa Barangay San Jose Gusu, Zamboanga City sadtong Setyembre 15.
Matandaan sadtong nakaligad nga adlaw ginkakas ni President Marcos Jr. ang price ceiling sa regular milled kag well-milled rice matapos makita ang mga indicator nga senyales agud kakason na ang price cap kasubong sang pagnubo sang presyo sang bugas sa mga merkado kag pagtaas sang suplay.
Ginpangunahan sang Chief Executive ang turn-over sang government assistance gikan Department of Agriculture (DA), Philippine Coconut Authority (PCA), Philippine Crop Insurance Corporation (PCIC), Agricultural Training Institute (ATI), Department of Labor and Employment (DOLE), Department of Health (DOH), Technical Education and Skills Development Authority (TESDA) and Commission on Higher Education (CHED).
Kaupod sang presidente ang tiglikom sang Department of Social Welfare and Development nga si Secretary Rex Gatchalian kag yara man ang presensya ni Capiz Governor Fredenil Castro, Congressman Tawi Billones, Roxas City Mayor Ronnie Dadivas kag anay Senador kag DILG secretary Mar Roxas. | Judy Ann Juare