Padayon pa karon nga giila ang patay’ng lawas sa usa ka lalaki nga nakaplagan sa sapa nga bahin sa Wellspring Highlands Phase 3, Talomo River, Catalunan Pequeño, ning dakbayan sa Davao, alas-2:50 kagahapon sa hapon.
Sa inisyal nga imbestigasyon sa Baliok Police Station, ala una sa hapon samtang nangaligo sa sapa ang usa ka Wiljon Manginsawan Loja, iyang nakita ang maong patay’ng lawas nga nasangit tunga nga bahin sa sapa, hinungdan nga dali kining nagpahibalo sa ilang Prk leader.
Dugang pa ni Loja nga wala sila makabantay kauban ang iyang mga higala sa nasangpit nga patay’ng lawas, gumikan gikan sila sa lugar usa ka adlaw una ang insedente.
Wala say CCTV camera nga nakamuntar duol sa maong dapit.
Nagpahigayon na og parallel investigation ang DCFU SOCO XI Team sa lugar diin nakaplagan ang biktima.
Kasamtangan, anaa sa Villa-Gan Funeral Homes and Services nga nahimutang sa GTH, Dumoy, ning syudad ang patay’ng lawas ug gikatakdang ipailalom sa otopsiya.
