LEGAZPI CITY – Nairehistro sa banwaan kan Tiwi, Albay an panibagong kaso nin rabies death sa probinsya.
Kinumpirmar ini kan Albay Health Provincial Office – Provincial Epidemiology and Surveillance Unit (PHO-PESU) kun sain residente kan Brgy. Bagumbayan kan nasambit na banwaan an biktimag 4 anyos na menor de edad.
Segun sa opisina, napag-araman kan Tiwi Rural Health Unit na kan Disyembre 2023 pa nakagat an biktima.
Dugang pa digdi, nahilingan ini nin mga sintomas kan nakalihis na Dominggo asin binawian nin buhay kan Lunes na aga.
Mientrastanto, tulos man nagsagibong aksyon an PHO asin nag-orden nin contact tracing puon sa pamilya kaini.
Sa ngunyan, nasa anom na kaso na an nairehistro sa probinsya paglaog kan taon 2024. | Brigada Intern MAUREEN BONANZA
