Kasado na ang gagawin na 3 araw na transport strike ng grupong MANIBELA sa susunod na Linggo simula sa Miyerkules, August 14 hanggang sa August 16.
Kasunod ito ng anunsyo ni Pangulong Marcos na tuloy ang modernisasyon sa kabila ng Senate resolution na suspendihin muna ang Public Transport Modernization Program.
Sa ginanap na pulong balitaan, sinabi ni MANIBELA Chairman Mar Valbuena, na mukha raw hindi nabasa ng buo ng Pangulo ang nilalaman ng resolusyon ng senado at hindi inalaman ang dahilan kung bakit sinuspinde.
Dagdag pa ni Valbuena, hindi niya raw alam kung nagbubulagbulagan ang Pangulo dahil hindi nito nakikita ang paghihirap ng mga tsuper, opereytor, at mga komyuter na apektado.
Samantala, kung babawiin naman raw ng Pangulo ang kanyang naging pahayag at papakinggan ang Senado ay ititigil nila ang tatlong araw na transport strike at sa halip ay magbibigay pa raw sila mg libreng sakay.
