Head injury kag hematoma ang naagum kang sangka pangayaw nga lalaki matapos dya nga ginlampusan kang dos por dos nga kahoy sa Prk. Oring-oring, Brgy. 8, San Jose, takna las-12:20 sa tag-irigma, Hunyo 18.
Ginkilala ang biktima kay Rencie Jay Lajo, 38-anyos, kasado, wara kang obra kag residente kang Brgy. Mohon, San Jose samtang ang mga suspek naman amo sanday Joemar Tanchuan, sa legal nga pang-edaron,single, panday kag si Joenil Tanchuan, may live-in partner lunsay mga residente kang Sitio Oring-oring, Brgy, 8, San Jose.
Sandig sa imbestigasyon,samtang nagatagay-tagay ang biktima kaimaw si alyas Ruth Labetoria sa sulod kang Labetoria Compound hinali lang nga nagsulod ang mga suspetsado kag sa wara maman-an nga rason ginlamposan ang biktima kang kahoy.
Gilayon nga gindara sa ospital ang biktima para sa pagpabulong samtang sa kadya padayon ang hot pursuit operation kang mga otoridad para sa pag-aresto kang nakapalagyo nga mga suspek.
