Natigayun eon nga mapauli si Paul Brian Kenneth Cubang nga nagpangayo it bulig sa Brigada News FM Kalibo para makauli sa Caloocan, Metro Manila.
Matandaan nga ku nagtaliwan nga Sabado nagpadueong iya sa Brigada si Cubang para manawagan it bulig.
Si Cubang nga native it Siloh Siay, Zamboanga Sibugay, hay sangka pahinante sa sangka trucking nga naga-deliver it gulay.
Kat makaabot segun sanda sa Panay Capiz hay nasamad ro andang truck.
Ginsamitan segun nanda nga tawagan ro andang amo pero owa eon sanda ginasabat ag owa man ginpadaehan it bulig ag sweldu.
Mga sang buean eon imaw nga nagtinir sa samad nga saeakyan ngani ginpakamayad nana nga magkipagsapalaran.
Nakisakay raya sa sangka truck halin sa Iloilo nga paagto it Malinao, Aklan.
Ginpanaog segun imaw sa diversion road sa Tigayon kung siin may naka checkpoint nga pulis ag ginturo imaw nga mag agto sa Brigada News FM Kalibo.
Matapos mabatian ro panawagan ni Cubang hay may pilang nagpaabot it andang bulig ag sambilog eon kara ro tag-ana it A & M fruits and vegetables ag A & B Fernandez Store sa Kalibo Public Market nga naging daean para eubusan rayang makauli it Caloocan, bangud ro nasambit nga establisyemento hay may trucking nga magaagto sa Manila para magpamakae it mga tinuea sa Divisoria.
Mabahoe man ro pasaeamat ni Cubang sa Brigada ag sa tanan nga nagpaabot it bulig kana. // ANN DESLENE SALAZAR