LEGAZPI CITY – Nagpapadagos ngunyan an pag-ako kan Provincial Education Department (PED) kan Albay nin mga graduate students na presenteng nasa masteral asin doctoral degree na magigin benepisyaryo para sa itatao nindang tabang-pinansyal.
Sa intrevista kan Brigada News FM Legazpi kay PED Albay head Charm Zuñiga, sinabi niya na para ini duman sa mga estudyanteng nasa graduate school na nasa pagpreparar o paggibo na nin saindang research partikularmente an thesis asin dissertation.
Segun kay Zuñiga, maabot sa PHP35K na kantidad nin asistensya an itatao kan gobyerno-probinsyal para sa mga naga-thesis na, mantang PHP50K man para sa mga nasa paggibo nin dissertation.
Sa ngunyan, dai pa masabi ni Zuñiga an numero kan mga nakapag-avail na alagad igwa su boot na mga natapyas huli sa kakulangan nin budget asin may iba pang dai nakapag-comply sa hinahagad nindang rekisitos.
Mientrastanto, nagkapira sa mga kwalipikasyon para sa asistensya, dapat su boot an sarong estudyante, sarong Albayano na naka-enroll sa anuman na graduate school kan maski anong kolehiyo asin unibersidad sa probinsya asin nasa estado na nin pagre-research.
