POSIBLENG makasulod ang Omicron variant sa COVID-19 sa nasud kung dili gilayun magpatuman og pagsirado sa border.
Kini ang gituohan ni Dr. Fidel Peñamante, president sa Philippine Medical Association o PMA-GenSan luyo nga may nahitabong mutation sa COVID-19 tungod sa ubos nga immunization rate sa South Africa, asa nadiskubrehan ang Omicron variant.
Nadiskubrehan usab sa Germany ang maong variant nga may ubos usab nga vaccination rate, mao nga awhag niini nga magpabakuna tungod kung daghan ang bakunado mas protektado sa unsa mang variant inay mga mabalaka gilayun.
Sa karon ginatun-an pa ang pagmugna og bag-ong bakuna batok sa Omicron variant apan sayo pa masayran kung unsa ang kinaiya sa maong variant kung kini mas makatakod ug makasukol sa kasamtangang mga bakuna.
Tungod sa pagbutho sa variants sa COVID-19 mahinungdanon gayud nga makumpleto ang pagbakuna ug magpa-booster shot nga ginahatag paglabay sa unom ka bulan.
