Indi magnaba sa 30 hasta 50 ka mga badjao ro namonitor it Kalibo MPS nga naga winarang iya sa banwa it Kalibo.
Sa interview it Brigada News FM Kalibo kay Deputy Chief Police Major Willian Aguirre it Kalibo MPS, nakipag istorya eon kanda ro LGU Kalibo nga kung mahimo ibalik nanda ro Task Force Ligtas sa Kalye nga nakumpunihan it DSWD ag Municipal Health Office ag Sanitation.
Ro nasambit nga task force hay para mailikaw ro mga badjao nga ma-exploit it mga sindikato, madisgrasya sa mga karsadahon ag mabantayan ro sanidad nanda bangud kaabuan sa mga raya hay nagaistar sa idaeum it tulay.
Dugang pa nga para maprotektahan man ro komunidad sa Kalibo nga ma-harass it mga badjao. Nasayuran nga kaabuan sa mga badjao hay naga padaea it linibo sa mga remittance center ag may Gcash pa.
Bangud kara, magahiwat it meeting ro Task Force, DSWD, MHO ag Sanitation para masolusyunan ro pag inabo it mga badjao sa Kalibo, agud ma-account ag ma-rescue ro mga raya para maibalik sa andang mga lugar. // ANN DESLENE SALAZAR
