Malampusong nakompiska sa ginsakpan sa Police Regional Office (PRO) 13 ang milyones nga kantidad sa iligal nga druga sa halos pito ka bulan nga operisyon batok druga.
Sa datos sa Regional Operations Division 13, moabot sa 605.628 gramos nga shabu ug 370.814 gramos nga marijuana ang nakompiska katumbas sa P6,972,495.89 nga kantidad.
Sumala ni Police Major Dorothy Tumulak, ang tigpamaba sa PRO 13, ang maong kantidad sa iligal nga druga maoy kantidad sa mga druga nga nakompiska sukad Septembre 17, 2020 hangtod Abril 30, 2021.
Moabot sa 283 ka mga illegal drug operations ang nalusad sa maong mga bulan sa tibuok rehiyon.
Sa gilusad nga mga operisyon, 313 ka mga suspetsado ang nadakpan samtang dunay 4 ang napatay human nisukol sa mga operatiba.
Tanang nadakpang buhi ang nag-atubang na sa kasong paglapas sa Republic Act (RA) No. 9165 kun Comprehensive Dangerous Drug Act of 2002.