MOKABAT sa P21,000 ang nakolekta gikan sa mga nagpakabanang katawhan nga gikan sa miyembro ug dili mga miyembro sa KaBrigadahan adlawng Sabado alang sa featured case sa KaBrigadahan GenSan nga si Salvacion Balanra nga taga Brgy.Mabuhay.
Si Rodrigo Balanra ang asawa ni ginang Salvacion ang nanawagan og tabang aron mapatambalan ang asawa nga nagahigda na lang tungod sa complicated nga sakit gawas pa nga may anak usab nga may special needs nga angayang suportahan.
Gikan alas otso sa buntag nga panawagan hangtud alas 9:50 sa buntag natigom ang P21,000 nga tabang asa may usa ka wala nagpailang donor ang mihatag og P10,000.
Samtang tulo sa gatusan ka mga gitabangan nga mga miyembro adlawng Sabado ang nagpasalamat sa nadawat nga tabang. Si Cristoff Claide Cristobal, 21-anyos taga Carcon Village, Lagao nagpasalamat human natabangan sa operasyon sa iyang appendicitis, ingon man si Ryan Lloyd Ocas, nga nanganak pinaagi sa ceasarian operation ang asawa ug si Yolanda Cabriana, taga Purok Roberto, Brgy.Labangal nga ang ana giatake sa kasing kasing ug kinahanglan ang maintenance sa tambal.
