MAY usa ka milyon ka pesos nga inisyal nga tabang ang provincial government sa Sarangani Province sa LGU-Maitum alang sa mga biktima sa pagbaha sa 17 ka barangay.
Segun kang MDDRMO Officer sa Maitum, Raymond Mayled nga ginahimo pa ang final rehabilitation ug action plan aron makapangayo og pondo sa national government alang sa naguba nga mga tulay resulta sa pagbaha.
Ang inisyal nga tabang matud pa nga P1 million gituohang madugangan pa tungod sa kadako sa damyos.
Ang mga namakwit nga pamilya nga mokabat sa 288 o kapin sa 923 ka indibidwal ang nahatagan og hot meals ug ubang hinabang sa tulo ka adlaw nga pagtinir sa municipal gym.
Inisyal nga damyos mokabat sa P130 million sa infrastructure ug pananum asa mokabat sa 65 ka balay ang totally damaged ug adunay mga partially damaged.
Gibutyag usab ni Mayled, sa karon nahimuan na usab og alternate road ang padulong sa Brgy. Opo sa Maitum nga dili maadtoan tungod sa naguba nga tulay.
