Ginpaabot it mga otoridad it Aklan sa mga ginikanan nga siguraduhon nga ro andang mga unga hay sa sueod eon it panimaeay sa oras nga magumpisa ro curfew hours.
Ro curfew hay halin 12 it tungang gabii hasta 4 it kaaganhon.
Nakabaton ro pamunuan it Malay Aklan it mga report nga maabung mga menor de edad sa Barangay Manocmanoc ro gaguwa gihapon sa oras it curfew ag kaabuan hay makit-an sa mga computer shop.
Ro mapamatud-an nga nag-eapas sa curfew hours hay pagamultahon it P2,500 o sambilog hasta daywang buean nga pagkapreso sa unang pageapas; multa nga P2,500 o daywa hasta ap-at nga buean nga pagkapreso sa ikaywang pag-eapas; ag multa nga P2,500 o tatlo hasta an-um nga buean nga pagkapreso para sa ikatlo nga pag-eapas.
Kaangut sa nasambitan nga balita, ginreport it Malay municipal police station nga 71 ka mga indibidwal sa barangay Yapak, Manocmanoc, ag Balabag ro ginpagmulta sa pag-eapas sa curfew hours./JIL B. LACSON
