Isa ka sibilyan ang patay samtang isa ang samdan sa gihimong dungan nga pagpangatake sa rebeldeng New People’s Army (NPA) diha sa lungsod sa Lanuza, probensya sa Surigao del Sur pasado alas – 9:00 sa nakalabay’ng gabii.
Ang namatay nailang si Eldrin Daraman, watchman sa duha ka backhoe nga gipanag-iyahan sa MR1 Construction Company samtang samdan ang isa ka sibilyan nga si Melvin Buniel.
Sumala ni Police Brigadier General Romeo Caramat, Jr., ang Regional Director sa Police Regional Office (PRO) 13, samtang gisulong sa 15 ka mga rebelde ang Lanuza Municipal Police Station, kamulo usab og sunog ang laing grupo sa mga rebelde sa duha ka backhoe nga gibantayan sa namatay diha sa Purok 2, Brgy. Zone 2 sakop sa maong lungsod.
Swerteng nasalba sa nirespondeng tropa sa 36th Infantry Battalion, Philippine Army ang laing tulo ka mga makinarya nga mao untay isunod sa pagsunog adtong higayona.
Base sa imbestigasyon, grupo ni Ka Megan sa Guerilla Front 30, North Eastern Mindanao Regional Committee ang nihimo sa pagpangsunog sa 2 ka mga backhoe ug nakapatay sa biktimang sibilyan.
Ang kapakyas matod pa sa MR1 Construction paghatag sa gipangayo sa mga rebelde maoy hinungdan kun nganong gisunog ug gipatay ang sibilyang nagbantay ug gika-angin sa lain pang sibilyan.