Nakahanda na ang tanan para sa Negros Occidental Police Provincial Office sa pagbantay sa pagsaulog sang All Saints, All Souls Day ukon Undas 2021.
Ini amo ang pagpasalig ni Police Colonel Romy Palgue, ang NOCPPO Provincial Director para sa mga Negrenses durante sa ginpatigayon nga konferensya upod sa mga Chief of Police sang mga kasyudaran kag mga kabanwahanan sa bug-os nga probinsya sang Negros Occidental sadtong lunes Oktubre 18, 2021.
Sa ginpapana-og nga Executive Order No. 21-47 ni Governor Eugenio Jose Lacson, nga nagapatuman sang temporaryo nga pagpasira sang tanan nga mga pampubliko kag pribado nga mga sementeryo kag memorial parks, columbaries sa probinsya sumugod Oktubre 30 tubtub Nobyembre 2, ang tanan nga mga stasyunan sang police ginamandu-an ang estrikto nga pagpatuman sang nasambit nga mando.
Subong man, ginamandu-an ang mga police stations sa pagpahamtang sa mas timprano sang mga Public Assistance Desks sugod Oktubre 25 bangud madamo sang mga pumuluyo ang magapakamaayo magbisita sang timprano sa ila sini mga minatay agud indi maabtan sang closure order.
20 porsyento nga kapasidad ang pahanugutan nga makabisita sa lulubngan sang ila mga hinigugma sa kabuhi kag igapatuman ang tanan nga minimum health protocols.
Ang PADs ukon ang Public Assistance Desks magapabilin tubtub sa Nobyembre 4 kag may yara man sang deployment sang mga beat patrollers kag iban pa nga mga police personnel agud mapasiguro ang kalinong kag katawhayan sa mga patyo. Ginahingyo naman ni Colonel Palgue ang kooperasyon sang mga pumuluyo.
