DAKO ang pagtuo ni Ben Claudio, presidente sa General Santos City Chamber of Commerce and Industry Incorporated nga may legal ug economic basis ang pag-lift sa ban sa open pit mining sa South Cotabato.
Segun kang Claudio nga may rason ang Sangguniang Panlalawigan sa maong probinsya nganong gitangtang ang ban sa open pit mining ug kini posible may kalabutan ang ekonomiya ug legal nga basehanan.
Dugang niini, dili lang usab kinahanglang one sided lang apan tan-awon usab unsa ang ginasulti sa gobyerno, sama sa kabalaka sa pagkadaut sa kinaiyahan ug uban pa, aduna matud pay mga governing bodies sama sa DENR nga musuta sa unsa mang mga bayolasyon sa patakaran nga ipatuman sa pagmina.
Hinuon gitino usab ni Claudio sa iyang personal nga panglantaw nga dili usab siya supak kung dili madayun ang proyekto sa maong lugar ug unfair usab nga isulti nga tungod sa kwarta naimpluwensyahan ang baruganan sa mga magbabalaod sa South Cotabato.
Samtang gidugang niini nga ugaling madayun usab ang mining project sa Tampakan, dili lang GenSan ang makabenepisyo apan kinatibuk-ang region-12.
Ang GenSan, usa sa makabenepisyo ug mulagsik pa ang ekonomiya tungod dinhi matud pa moagi sa dakbayan ang mga ipang-export ug materyales nga musulod.
Gawas niini, ang mga langyaw ug mga executives nga mudumala sa kompanya didto, dinhi sa GenSan motinir ug magpuyo gawas pa sa share sa revenue sa lugar. Nasayran nga daghang sector labi na ang simbahan ang padayung gapanawagan sa pagkontra sa open pit mining tungod sa kadaut nga mamugna niini sa kinabuhi sa mga katawhan sa rehiyon.
