Napalgan nga wala nay kinabuhi ug aduna nay daghang samad tinigbasan sa iyang ulo ang usa ka live stock buyer o negosyante og hayupan diin naligo na kini sa kaugalingong dugo sa barangay Kanyuco, lungsod sa Dumanjug karong buntag, Mayo 30, 2024.
Giila ang biktima nga si Leonardo Macario, 51-anyos, negosyante og buy and sell sa mga hayopan ug residente sa nahisgutang barangay.
Sa inisyal nga imbestigasyon sa kapulisan sa Dumanjug, nasayran nga ang biktima, nilakaw kaganihang ala una sa kaadlawn aron mo-adto sa Mantalungon Livestock Market sa Mantalungon Barili.
Giingong nahibulong ang iyang anak nga si Jerico Macario nga wala na-apas ang iyang amahan sa tabu sa Mantalungon hinungdan nga mipa-uli kini aron unta sa pagsusi kung unsa ang nahitabo apan, nakit-an na lang niini ang biktima nga patay na duol sa iyang motorsiklo sa kilid sa karsada.
Ang biktima naka-angkon og daghang samad tinigbasan sa iyang ulo nga maoy hinungdan sa iyang hinanaling kamatayon ug ang mamumuno, daling mi-ikyas dala ang gibana-banang P500,000 nga kwarta sa biktima.//
